جب کبھی تیرا نام لیتے ہیں

جب کبھی تیرا نام لیتے ہیں 

دل سے ہم انتقام لیتے ہیں 

میری بربادیوں کے افسانے 

میرے یاروں کا نام لیتے ہیں 

بس یہی ایک جرم ہے اپنا 

ہم محبت سے کام لیتے ہیں 

ہر قدم پر گرے ہیں پر سیکھا 

کیسے گرتوں کو تھام لیتے ہیں 

ہم بھٹک کر جنوں کی راہوں میں 

عقل سے انتقام لیتے ہیں 

تم نے سچ بولنے کی جرات کی

تم نے سچ بولنے کی جرات کی

یہ بھی توہین ہے عدالت کی

منزلیں راستوں کی دھول ہوئیں

پوچھتے کیا ہو تم مسافت کی

اپنا زادِ سفر بھی چھوڑ گئے

جانے والوں نے کتنی عجلت کی

میں جہاں قتل ہو رہا ہوں وہاں

میرے اجداد نے حکومت کی

پہلے مجھ سے جدا ہوا اور پھر

عکس نے آئینے سے ہجرت کی

میری آنکھوں پہ اس نے ہاتھ رکھا

اور اک خواب کی مہورت کی

اتنا مشکل نہیں تجھے پانا

اک گھڑی چاہئے ہے فرصت کی

ہم نے تو خود سے انتقام لیا

تم نے کیا سوچ کر محبت کی

کون کس کے لیے تباہ ہوا

کیا ضرورت ہے اس وضاحت کی

عشق جس سے نہ ہو سکا ، اس نے

شاعری میں عجب سیاست کی

یاد آئی تو ہوئی شناخت مگر

انتہا ہو گئی ہے غفلت کی

ہم وہاں پہلے رہ چکے ہیں سلیم

تم نے جس دل میں اب سکونت کی

سلیم کوثر